ಅಂಕೋಲಾ: ತಾಲೂಕಿನ ತರಂಗಮೇಟು ಹಾರವಾಡದ ನಿವಾಸಿಯಾದ, ಕಳೆದ ಕೆಲ ವರ್ಷಗಳಿಂದ ಮಾನಸಿಕವಾಗಿ ಅಸ್ವಸ್ಥರಾಗಿದ್ದ 70 ವರ್ಷದ ವೃದ್ಧೆಯೊಬ್ಬರು ನಾಪತ್ತೆಯಾಗಿದ್ದಾರೆ. ಈ ಬಗ್ಗೆ ಅವರ ಪುತ್ರಿ ನೀಡಿದ ದೂರಿನ ಮೇರೆಗೆ ಅಂಕೋಲಾ ಪೊಲೀಸ್ ಠಾಣೆಯಲ್ಲಿ ಮಹಿಳೆ ನಾಪತ್ತೆ ಪ್ರಕರಣ ದಾಖಲಾಗಿದೆ (ಕ್ರೈಂ ನಂ: 83/2026). ಕಾಣೆಯಾದವರನ್ನು ಸಾವಿತ್ರಿ ಸುಕ್ರು ಹರಿಕಂತ್ರ ಎಂದು ಗುರುತಿಸಲಾಗಿದೆ.
ವೃದ್ಧೆ ಸಾವಿತ್ರಿ ಅವರು ಮೀನುಗಾರಿಕೆ ವೃತ್ತಿ ಮಾಡುವ ತಮ್ಮ ಮಗಳು ಶ್ವೇತಾ ಆನಂದ್ ಹರಿಕಂತ್ರ ಅವರ ಮನೆಯಲ್ಲಿಯೇ ವಾಸವಿದ್ದರು. ಮೇ 03 ರಂದು ರಾತ್ರಿ ಮಗಳ ಮನೆಯಲ್ಲಿಯೇ ಮಲಗಿದ್ದ ಇವರು, ಮೇ 04 ರ ಮುಂಜಾನೆ ಸುಮಾರು 6:00 ಗಂಟೆಯ ಹೊತ್ತಿಗೆ ಮನೆಯಿಂದ ಹೊರಹೋಗಿದ್ದು, ಈವರೆಗೂ ಹಿಂತಿರುಗಿಲ್ಲ. ಎಲ್ಲೆಡೆ ಹುಡುಕಾಡಿದರೂ ಅವರ ಸುಳಿವು ಸಿಗದ ಹಿನ್ನೆಲೆಯಲ್ಲಿ, ಪುತ್ರಿ ಶ್ವೇತಾ ಅವರು ಅಂಕೋಲಾ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ಕಾಣೆಯಾದವರ ಚಹರೆ: ನಾಪತ್ತೆಯಾದ ಸಾವಿತ್ರಿ ಅವರು ಸುಮಾರು 4.5 ಅಡಿ ಎತ್ತರವಿದ್ದು, ಕಪ್ಪು ಮೈಬಣ್ಣ, ದುಂಡು ಮುಖ (ಗೋಲು ಮುಖ) ಹಾಗೂ ಸಾಧಾರಣ ಮೈಕಟ್ಟು ಹೊಂದಿದ್ದಾರೆ. ಇವರ ತಲೆಕೂದಲು ಕಪ್ಪು ಮತ್ತು ಬಿಳಿ ಮಿಶ್ರಿತವಾಗಿದೆ. ಮನೆಯಿಂದ ಹೋಗುವಾಗ ಕೆಂಪು, ಹಳದಿ ಹಾಗೂ ನೀಲಿ ಬಣ್ಣದ ಸೀರೆ ಮತ್ತು ಕಡು ನೀಲಿ ಬಣ್ಣದ ಬ್ಲೌಸ್ ಧರಿಸಿದ್ದರು. ಇವರು ಕನ್ನಡ ಭಾಷೆ ಮಾತನಾಡುತ್ತಾರೆ. ಅಲ್ಲದೆ, ಇವರಿಗೆ ಎಡಕೈ ಶಸ್ತ್ರಚಿಕಿತ್ಸೆ ಮಾಡಲಾಗಿರುವ ಗುರುತಿದೆ ಎಂದು ಪ್ರಕಟಣೆಯಲ್ಲಿ ವಿವರಿಸಲಾಗಿದೆ.
ಈ ಮೇಲಿನ ಚಹರೆಯುಳ್ಳ ವೃದ್ಧೆ ಎಲ್ಲಾದರೂ ಕಂಡುಬಂದಲ್ಲಿ ಕೂಡಲೇ ಅಂಕೋಲಾ ಪೊಲೀಸ್ ಠಾಣೆಯ ದೂರವಾಣಿ ಸಂಖ್ಯೆ: 08388-220333, ಮೊಬೈಲ್ ಸಂಖ್ಯೆ: 9480805250 / 9480805268 ಅಥವಾ ಇಮೇಲ್: ankolakwr@ksp.gov.in ಅನ್ನು ಸಂಪರ್ಕಸಿ ಮಾಹಿತಿ ನೀಡಬಹುದಾಗಿದೆ.
ವರದಿ: ಸುಪ್ರಿಯಾ ವಿಷ್ಣು ನಾಯ್ಕ
