ಅಪಾಯಕಾರಿ ರಾಸಾಯನಿಕ ಸೋರಿಕೆಯನ್ನು ನಿಯಂತ್ರಣಕ್ಕೆ ತಂದು, ಟ್ಯಾಂಕರ್ ವರ್ಗಾವಣೆಯನ್ನು ಸಮರ್ಪಕವಾಗಿ ನಡೆಸಿದ ಜವಾಬ್ದಾರಿಯುತ ಕಾರ್ಯಾಚರಣೆಗೆ ಉತ್ತರ ಕನ್ನಡ ಜಿಲ್ಲಾಧಿಕಾರಿಗಳಿಂದ ಅಂಕೋಲಾ ತಹಶೀಲ್ದಾರರಿಗೆ ಪ್ರಶಂಸನಾ ಪತ್ರ..

ಅಂಕೋಲಾ: ನವಗದ್ದೆ ಸಮೀಪ ರಾಷ್ಟ್ರೀಯ ಹೆದ್ದಾರಿ–63ರಲ್ಲಿ 18 ನವೆಂಬರ್ 2025ರಂದು ಸಂಭವಿಸಿದ ‘ಮೋನೊ ಮೆಥೈಲ್ ಅಮೈನ್ ಅನೈಡ್ರಸ್’ ರಾಸಾಯನಿಕ ಟ್ಯಾಂಕರ್ ಉರುಳುವ ಘಟನೆ ಸಂದರ್ಭದಲ್ಲಿ, ತುರ್ತು ಕಾರ್ಯಾಚರಣೆಯನ್ನು ಸಮರ್ಪಕವಾಗಿ ಸಮನ್ವಯಗೊಳಿಸಿದ ಕಾರಣಕ್ಕೆ ಅಂಕೋಲಾ ತಹಶೀಲ್ದಾರರಾದ ಡಾ. ಚಿಕ್ಕಪ್ಪ ನಾಯಕರಿಗೆ ಕಾರವಾರದ ಜಿಲ್ಲಾಡಳಿತದಿಂದ ಪ್ರಶಂಸನಾ ಪತ್ರ ನೀಡಲಾಗಿದೆ.

ರಾಸಾಯನಿಕ ಸೋರಿಕೆಯ ವೇಳೆ ಸಾರ್ವಜನಿಕ ಆರೋಗ್ಯ ಮತ್ತು ಪರಿಸರಕ್ಕೆ ಅಪಾಯ ಇರುವ ಸಾಧ್ಯತೆ ಮನಗಂಡು, ಅಗ್ನಿಶಾಮಕ ದಳ, ಆರೋಗ್ಯ ಇಲಾಖೆ, ಫ್ಯಾಕ್ಟರೀಸ್ ಅಂಡ್ ಬಾಯಿಲರ್ಸ್ ಇಲಾಖೆ ಹಾಗೂ ಮಾಲಿನ್ಯ ನಿಯಂತ್ರಣ ಮಂಡಳಿ ಅಧಿಕಾರಿಗಳೊಂದಿಗೆ ತಕ್ಷಣ ಸಮನ್ವಯ ಸಾಧಿಸಿ ನಿಯಮಾನುಸಾರ ಕ್ರಮ ಕೈಗೊಂಡಿರುವುದು ಜಿಲ್ಲಾಧಿಕಾರಿಗಳ ಅಧಿಕೃತ ಪತ್ರದಲ್ಲಿ ದಾಖಲಿಸಲಾಗಿದೆ. ಸೋರಿಕೆಯಾಗಿದ್ದ ರಾಸಾಯನಿಕವನ್ನು ಸುರಕ್ಷಿತವಾಗಿ ಮುಚ್ಚುವಿಕೆ ಮಾಡಿ, ಟ್ಯಾಂಕರ್ ಅನ್ನು ಸುರಕ್ಷಿತ ಗಮ್ಯಸ್ಥಾನಕ್ಕೆ ವರ್ಗಾಯಿಸುವ ಪ್ರಕ್ರಿಯೆಯನ್ನು ನಿರ್ವಹಿಸಿರುವುದನ್ನು ಪತ್ರದಲ್ಲಿ ವಿಶೇಷವಾಗಿ ಉಲ್ಲೇಖಿಸಲಾಗಿದೆ.

ಈ ಕುರಿತು ಪ್ರಶಂಸನಾ ಪತ್ರ ನೀಡಿದ ಕಾರವಾರದ ಜಿಲ್ಲಾಧಿಕಾರಿ ಮತ್ತು ಜಿಲ್ಲಾ ದಂಡಾಧಿಕಾರಿಣಿ – ಕೆ. ಲಕ್ಷ್ಮೀ ಪ್ರಿಯಾ, ಐ.ಎ.ಎಸ್. ಅವರು, “ಸಾರ್ವಜನಿಕ ಸುರಕ್ಷತೆ ಮತ್ತು ಪರಿಸರ ಸಂರಕ್ಷಣೆಗೆ ನೀಡಿದ ತ್ವರಿತ ಪ್ರತಿಕ್ರಿಯೆ ಮತ್ತು ವೃತ್ತಿಪರತೆ ಶ್ಲಾಘನೀಯವಾಗಿದೆ” ಎಂದು ಪ್ರಶಂಸನಾ ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ. ರಾತ್ರಿ ವೇಳೆ ಆರಂಭವಾಗಿ ಬೆಳಗಿನ ವೇಳೆಯವರೆಗೆ ಮುಂದುವರಿದಿದ್ದ ಈ ಕಾರ್ಯಾಚರಣೆ, ಕ್ಷೇತ್ರಮಟ್ಟದ ತುರ್ತು ನಿರ್ವಹಣೆಗೆ ನೀಡಿದ ಕಾಳಜಿಯನ್ನು ಪ್ರತಿಬಿಂಬಿಸುತ್ತದೆ.

ಸ್ಥಳೀಯ ಆಡಳಿತ ವಲಯದಲ್ಲಿ ನಿಯಮ ಪಾಲನೆಗೆ ಕಟ್ಟುನಿಟ್ಟಿನ ನಿಲುವು ಮತ್ತು ತುರ್ತು ಕಾರ್ಯಪದ್ಧತಿಗಳಲ್ಲಿ ತಕ್ಷಣದ ತೀರ್ಮಾನಗಳಿಂದ, ಡಾ. ಚಿಕ್ಕಪ್ಪ ನಾಯಕರು ಅಂಕೋಲಾದಲ್ಲಿ ಖಡಕ್ ಹಾಗೂ ಕ್ರಮಬದ್ಧ ಆಡಳಿತಾಧಿಕಾರಿಯಾಗಿ ಗುರುತಿಸಿಕೊಂಡಿದ್ದಾರೆ. ಸಾರ್ವಜನಿಕ ಸುರಕ್ಷತೆಯನ್ನು ಮೊದಲ ಆದ್ಯತೆಯಾಗಿ ಪರಿಗಣಿಸುವ ಈ ರೀತಿಯ ಕಾರ್ಯಪದ್ಧತಿಗೆ ದೊರೆಯುತ್ತಿರುವ ಪ್ರಶಂಸನಾ ಪತ್ರಗಳು, ಕ್ಷೇತ್ರಮಟ್ಟದ ಅಧಿಕಾರಿಗಳಿಗೆ ಇನ್ನಷ್ಟು ಜವಾಬ್ದಾರಿಯುತ ಮತ್ತು ಗುಣಮಟ್ಟದ ಸೇವೆ ಒದಗಿಸಲು ಪ್ರೇರೇಪಕವಾಗುವಂತಿವೆ ಎಂದು ಆಡಳಿತ ವಲಯದಲ್ಲಿ ಅಭಿಪ್ರಾಯ ವ್ಯಕ್ತವಾಗಿದೆ.

ವರದಿ: ಕಿರಣ ಗಾಂವಕರ